~Provincia Romana – Verona, 21 decembre 1840

Padre Luigi Berlendis.~

Pax Christi

Admodum Reverende in Christo Pater

Perjucundum plane mihi accidit, ut, cum Te hac prima vice absens per litteras alloquar, a Te [aus]im expostulare quod Tibi certe scio concedere in Domino gratissimum. Et ut rem a capite accersam, hęc tota orationis ratio. Paucis elapsis mensibus ab ingress hujusce Domus Probationis Societatis Jesu, et dum per mensem Exercitiis Spiritualibus Sancti Patris NostriIgnatii operam dabam, primum tunc exorta desideria me alliciebant de Apostolicis exteris Missionibus. Quę desideria magis magisque in dies, nullo obice remorante succrescentia, adeo longe aliter atque antea me habuerunt, ut, qui eatenus summam animi repugnantiam ad illud ministerii genus fueram expertus, mihi proinde de illo fere […]ice cogitare, et loqui solemne prorsus atque dulcissimum evadere[r].

Quid plura? Re maturius in Domino considerata, et Reverendo Patri Josepho Ferrario hujus Domus Rectore annuente, votum emisi de Missionibus ejusmodi per singolos quatuor vel quinque annos semel saltem in anno a Superioribus petendis. Nuncupatis igitur nuper simplicibus Religionis votis, modo ad istiusmodi particulare votum hoc anno delabente solvendum, Paternitati Tuę ferventissimas exhibeo preces, ut mei voti ac desiderii sis memor, atque illa aliquando compleas, si Sanctissimę Dei Voluntati, cui me penitus integreque submitto, placea[r] ad tale me vitę institutum eligere atque recipere.

Interim Tibi fausta omnia ex animo adprecatus, Paternam humillime peto Benedictionem.

Humillimus, indignissimus servus

et filius in Christo

Aloisius Berlendis Societatis Jesu

Veronę ex Tirocinio Societatis Jesu die 21 Decembris 1840

Veronae, 21 Decembris 1840. // [.] Berlendis // Petit missiones exteras.

Admodum Reverendo in Christo Patri // Patri Joanni Roothaan Pręposito Generali // Societatis Jesu // Romae