~Provincia Romana – Piacenza, 19 marzo 1841.

Fratello Scolastico Andreas Garelli~

Admodum Reverende in Christo Patri

Joanni Roothaan

Societatis Iesu Praeposito Generali

salutem in Domino atque felicitatem

Meae animi quieti consulendi gratia, et ferventioris vitae studio ductus desideria circa missiones ad infideles admodum Reverendae Paternitati vestrae aperire statui. Vocor ipse Andreas Maria Garelli Veronensis, Societatis Iesu Scholasticus in Collegio Placentino, annorum duorum circiter et viginti. Veronae apud Reverendum Patrem Joseph Ferrari et Patrem Petrum Viscardini tirocinium posui a XV. Kalendas Sextili 1837. ad mensem circiter Aprilem 1839: quo tempore ob sanguinis ad cutem eruptionem, qua nunquam antea correptus fueram, paternam domum repetere jussus sum. Post sex curationis menses cum medici me ab illa corporis aegritudine convaluisse pronunciassent, iterum vestibus Societatis indutus Placentiam cum ceteris missus sum. Placentiae III Nonas Quintiles anno elapso Religionis vota summa animi Laetitia nuncupavi: ubi adeo firma utor valetudine, ut neque illo pristino, neque alio quovis morbo omnino laboraverim; et per haec cineralia jejunia, studiorum accessione, nihil passus sim. Quoad vero studia ante priorem in Societatem ingressum humaniorum litterarum curriculum exegi, et philosophicis et mathematicis disciplinis per annum operam dedi: in Societate vero Placentiae anno elapso Rhetoricae studui: nunc autem ad Philosophiam et Mathesin repetendam operam incumbo.

Ad haec vero desideria quod attinet, Paternitati vestrae fateor me jam inde a sex annis perpetuo ea habuisse; adeo ut uno eodemque fere tempore et animum ad Societatem ineundam et ad Christianam fidem propagandam in me Deus congesserit. Atque mihi vitam in mundo actam repetenti occurrit, die quadam, simul atque sancta de altari libassem, ad Turcas Christo reconciliandos rapi quodammodo sensisse. Ad ejusmodi desiderium fovendum valde is mihi profuit, quo ad confessiones utebar: hoc mihi in tirocinio saepe Reverendus Pater Joseph Ferrari, hoc Pater Petrus Viscardini approbarunt, et ad illud excolendum adhortati sunt. Itaque factum est,

//

ut cum postea domi affectam curarem valetudinem, in missionibus animum et cogitationem omnem po[s]uissem: quo vertente tempore votum emisi, per quod ad animarum salutem via mihi facilius pateret; id est, propagandi cultum Sanctorum Cordium Jesu et Mariae.
At vero quanquam hoc desiderium perpetuo viguerit, non semper tamen ad hanc vel illam certam infidelium regionem ferri expertus sum. Interdum me desiderium tenebat locorum, quae Sanctus Franciscus Xavier vestigiis et laboribus perlustravit; saepe erga missionem Japonicam et Sinensem affectus sum: Syria in primis, Aegyptus in animo erat: in Americam quoque navigare flagrabam, utpote quae prae ceteris mundi partibus a nostris Patris et Fratris exculta fuerit, et ad veritatem et virtutem formata. Hujus autem meae petitionis hic totus scopus est et finis; ut hac ratione majores in dies progressus in pietate feram; ut activae et absconditae vitae Jesu meam magis conformem; et nostrorum Patrum et Fratruminsistens vestigiis inter labores verum Jesu socium me exhibeam.

Itaque haec omnia mea desideria ita Tuae prorsus committo voluntati, ut per Dei gratiam, Paternitatis Vestrae nutu, aeque praesto sim manendi aut proficiscendi; et ad quamcumque expeditionem, sine ulla temporum exceptione, paratum me praebeam; ita quoque fiet, ut viribus divinitus mihi addit[..], divinaque gratia undique circumseptus contra omnes difficultates ac pericula perstem, et libenti fortique animo morti quoque ipsi pro Christo occurram. Haec sunt, quae Paternitati Vestrae significare volui: ad quod praestandum cum anno superiore Reverendus Pater Provincialis Joseph Spedalieri me adhortatus est; et per hos dies Pat[ris] Spiritualis permissus accessit, qui semper item desideriis annuerat. Admodum Reverendae Paternitati vestrae omnia bona ac fausta a Deo comprecor: ac per Jesu Christi sanguinem peto suppliciter, ut has meas petitiones spernere nolit.

Obsequentissimus in Christo filius

Andreas Maria Garelli Societatis Iesu Scholasticus

Placentiae XIV Kalendas Apriles 1841.

Placentiae XIV Kalendas apriles. – Frater Andreas Garelli // Petit missiones quaslibet

Al Molto Reverendo in Cristo Padre // Il Padre Giovanni Roothaan // Preposito Generale della Compagnia di Gesù // Roma