[Multum] Reverende in Christo Pater

Benedictus Dominus, cujus gratia factum est, ut cum diu desiderassem nunc tandem exponam Paternitati Vestrae desiderium meum. Nam cum ab ipso tirocinio desiderassem missiones ad exteras nationes, praesertim ad Indias, Sinas, et Japoniam, et de ipsa Japonia, cum sępius orassem, quamdam sensi fiduciam fore impetraturum. Cursu temporis fiducia illa frigescente desiderium et spem nunquam amisi. De his, et variis diversorum spiritum agitationibus, quibus nunquam diu carui, cum confessarios consuluissem, ipsi vocatione probata petitionem semper distulerunt. Quadam vice non dubius, sed eo quod conscius diuturnae tepiditatis timebam ne gratiam amisissem, oravi Sanctum Franciscum Xaverium, ut signum daret devotionem internam, qua obtenta idem confidentius tentavi aliis vicibus; et cum bene res successisset, factum est ut huic maxime orationi confiderem, qua videbar omnia impetrare: si mittendus sum, hoc mihi tribuas.

Ut audivi spem esse ut restituerentur Societati missiones in Iaponiam, insperata devotione correptus videbar exaudiri ex parte; mox turbatione secuta ad Reverendum Patrem Provincialem rem detuli, qui ad exercitiorum spiritualium tempus examinandam transtulit, quo tempore re probata omnino scribendum esse dixit. Quapropter haec scripsi Paternitati Vestrae, ut si voluntas Dei ea est, suo tempore oblata occasione me etiam inter cęteros [talia] desiderasse recordetur. Suis Sanctis Sacrificiis me commendo.

Paternitatis Vestrae

Infimus in Christo Servus

Augustinus Massa

Die 3. Novembris 1838 Neapoli.